Biejen
Vake he’j ne lefebrieje te daanken an nen measter of nen leraar. In dit geval geet het um menear Scheepmaker, leraar biologie an de Kweekschole in Zwolle. Eare wee eare tookeump. Scheepmaker heul nit van celbiologie of van gedoo achter nen microscoop, iej mossen de weareld van plaanten, beeste en vöggel learen an de haand van de praktijk: met de klassen de boer op goan en dan botaniseren en determineren. Hee organiseerden nen biejencursus op dee kweekschole, met een poar echte kasten d’r biej, met nen ervaren imker. Mooi um te zeen dat oonzen grammieterigen directeur op de löppe gung vuur ne bieje den um achternoa zat.
Een grammieterigen directeur gung op de löppe vuur ne bieje den um achternoa zat
Iej learden doar nen hoop. Iej wussen in ’t vervolg dat d’r een instituut besteun: ‘het Bijenhuis’ in Wageningen. Het besteet nog aait, doar kö’j ook van alns bestellen, keunstroaten, reamkes, biejenkappen, ne biejzeundere piepe um rook te bloazen oawer de biejen a’j het deksel van de kaste haalden, rechtevoort he’j doar anmaakblukskes vuur. Iej völlen van de ene verwoonderige in de aandere verbazige. Iej learden um het oetzwoarmen van nieje volken te vuurkommen, met het oor tegen ne kaste um te lusteren of d’r nieje koneginnen oetkwammen, iej learden dat biejen met zin allen op éen soort blöaisel vleugen: kastanje, accacia, koolzoad, klaver en heaide, um mear wat te neumen.
A'j de biejenkasten noar 'n Hoalterboarg brachen, mossen de kasten dichte, op een anhangweangtje, op weg noar een heaideveald. In Dreante kaantelden zon aanhangweangtje eunsteböawten met zes kasten. Dat zorgden vuur nen wolk gleujnig norkerige biejen dee geane 'n angel kwietwollen. De Weagenwachter van de ANWB dorf d'r nit biej te kommen.
Biejen zeent nogal feministisch. Ne kaste hef pakweg 60.000 vrouwleu as woarksters, éne koneginne en 1000 darren. Alns dreejt um de koneginne, de keals zeent allenig van belang as het biejenvolk in ’t vuurjoar oetvlög en dan mangt de keals, de darren, vechen um de eerste pries: wee krig de koneginne hoge in de loch te pakken? As dat geunstig oetpakt en de koneginne eaikes leg, wordt bekaand alle darren in ‘t noajoar vakkeundig duur de woarksters of emaakt. Dan lingt de darren dood vuur de kaste.
Iej mangt d'r nit an deanken dat het d'r in de meanskenweareld net zo an to geet… In oons laand blif dan allenig Maxima met 8 miljoen vrouwleu. Met een soort Marga Rutte as premier. Ik hebbe doarumme destieds toch mear minne biejenkaste van de haand edoan….
Gerrit Kraa