Platte column oawer ‘t Pepierfabriek
AlgemeenIk leupe vanwekke zo mear binnen biej Stempher in ’n Mos. Vuur disse kraante. En ‘n eersten den’k tegen de hoed an leupe was verestig Alie Borghoes. Ik mos eawen twee minuten inregeln, want ik wördn in mooi eagentieds Riessens te woord estoan. Viej zeent in 2022 al zó vuurgeprogrammeerd de’j doar al geent gin reknge mear met hooldt. Mear biej de Koninklijke Stempher gebuurt det gewoon. Nen woarmen douche. Een Stoom is een begrip in Riessen, mear Stempher ook. In Riessen kenne viej dee oondernemming as ’t Pepierfebriek. Min va hef der woarkt, lange joaren en met de wille. En ikke zelf heb der minstens acht zommers vekaansiewoark edoan.
Ik kan al dee naams zo wier opleppeln: de Geaje van de Ballo, Jan van de Pluze, Wilm van Suuske, Wim van Hendriene, Jans van Ziene, Kobus van Groot-Jan, Bram van Jan-Hoarm, Dieks van de Keuns, Mans Rietman, Jan van ’n Blikkert, Arie van de Schutte, Wim van Karkdiek, Mans Woolters, Bets van ’n Kikkert en Jans van de Rotte. Der warn der ook een poar dee’j neet met ’n biejnaam keanden, want det warn gin Riessenders: Schuiling en Briene.
Schuiling zinn zönne he’k een zetje terugge nog esprökn, want hee speuldn met in Het Verzet Kraakt en Briene was de va van CDA-roadslid Rieni Briene den later börgemeaster is ewörden. Alie Borghoes was der 40 joar terugge ook al en Henk van de Porrebakker (H. G. D. Siegerink, later PvdA-roadslid) was personeelschef. P & O-manager het det rechtevoort. En ’t Pepierfebriek steun tóén al bekeand as nen sociaaln woarkgewer, want ook at oe ne kleanigheaid mangeln - of zelfs ne grotigheaid - dan wa’j welkom. Ik zee Geait Kolman met nen angepasten auto van ’n Nijverdal nog zo binnenkomn en op zinn angepasten stool kroepn. En dan woarkten ze keaihard: zäkke instekn. Met Jesok en Keaizer deedn ze dan ‘n soort wedstried wee de meesten zäkke trechte kon maken.
Ik kan der wal een book oawer schriewn. Miskien koomp ’t doar nog ’s van... Ook mooi: toen ik biej de receptie steun te wochen – op ’n Plestiek, want det is dee aandere ofdeling nöast Schutemaker – köm Jan Siemerink doar langs. En hee zea verestig: “Iej dachen: loa’k der toch mear wier ’s hen goan?” Inderdaad: a’k gin steal mooi woark har, gong ik der zo wier hen. De sfeer was der aaltied prima. Ze neumden zich ginne platte organisatie, mear ze wárn het gewoon. Gemoedelijk in ’n umgaank. ‘n Good loon; óók vuur skooljongs, zo a’w toen wördn eneumd. Lekker etn in de oawer-uurn. Noh jea…ze zeukt nog alverdan woarkvolk. A’j oe nog weelt verbettern: dreks solsieteern!
Gerrit Dannenberg