Platte column over trends
AlgemeenHenri Ford was een oprichter van wat non het autofebriek ‘Ford’ is. As ene van de eerste autofabrikaanten had hee al nen soort lopende band. Det woarken efficient want de bandmedewerker deden verdan het zelfde en wus op doer nit aanders. Biej Henri kö’j kiezen oet dree kluren: zwart, zwart en zwart. Doar howen gin meanske langer oawer noa te deanken, heel praktische allemoal en gin meanske nöaln der oawer.
Tesla hef ook een betjen noar Ford ekekken, want biej de massa-Tesla’s, model 3 (dee met det wichterachtige eande/Donald Duck-snuutje) köj kiezen oet wit of zwart of blauw, mear dan hooldt het zo’n betjen op.
Mear kiekt vuur de oardigheaid is noar de hedendaagse fietsen. Nog nit zo heel lange e-leden ha’j roestbroene batavussen, greun kon ook, mear gin zwart. De opa en oma- fietsen warn dan wal wier zwart, later mangs ne witten en nog wier later zo’n beetje alle kluren. Racefietsen warn vake wit, of blauw of gries metallic. Kiekt non is biej Warner Sok en iej zeet preenspoal zwarte fietsen, metallic of dof, at het mear zwart is. Net as Ford.
Lastig zeuken de zommerdag op ’t zwembad, tuskens doezend fietsen oewn zwarten Transport Batavus te veenden. En met het verzwarten van de fietsencollectie zag iej ook de verbatterie-isering van het fietsenpark. Verschrikkelijk, vuural die 70+ ers dee oe verbiejroast, strak vuur zik oet kiekend, gas gewen, want zee jaangt vandage wal 70 kilometer met dee knooppeunten. Ze zeet ginnen klemmerd of nen buizerd, want ze munn verdan!
En is het oew wal op-evöllen dej wier speegels an de fietse zeet. ’n Gemeenteontvanger, Jan van Beneadske, jaggen in de joaren 70 ook al met zo’n spegel. Jan was nit al te groot van postuur, mear hee mos vuural rechtop zitten, um in ’t spegel te kieken en doarmet leek hee wal 10 centimeter grötter.
Kortens zag ik nen fietser met een steur van minstens 1,45 cm breed en dán doar nog wier een spegel der an. Den nöm zo’n betjen de hele Skorfmoat in beslag. En umdet dee fietse netuurlijk zwart van kluur was én met de batterieje wal 60 km/uur fietsen, was het een staatsgevoarlijk projectiel.
Het wordt alverdan onveailiger op de weg.
Gerard Voortman